Prodhimi, standardi, cilësia, markat dhe shitjet janë të lidhura në mënyrë eksplicite me marketingun.
Shumë kompani kanë një departament marketingu në strukturën e tyre funksionale. Shumë të tjera bëjnë marketing pa një skuadër të tillë, por duke ndjekur intuitën apo ekipe provizore marketingu. Ekzistojnë kompani, të cilave nuk iu nevojitet marketingu, ndërkohë që në mënyrën e tyre ato bëjnë marketing. Po kështu ekzistojnë shumë teori të konsoliduara mbi rolin e departamentit të marketingut brenda organizatës apo rëndësinë e marketingut në përgjithësi. Prodhimi, standardi, cilësia, markat dhe shitjet janë të lidhura në mënyrë eksplicite me marketingun. Konsulencemarketing është pjesë e opinionit që marketingun dhe shitjet i listojnë në faqe të parë. Ka me qindra shembuj, të cilët vërtetojnë katërcipërisht, falimentin e mjaft kompanive, vetëm për shkak të mungesës së marketingut apo aplikimit të një marketingu mjaft të dobët. Po kështu njihen me qindra raste këtu në Shqipëri, Kosovë etj, ku mjaft kompani paraqiten të suksesshme, jo për produkte/shërbime që shkaktojnë radhë dhe lot, por, për shkak të një marketingu agresiv dhe shumë dimensional.
Le të trajtojmë një shembull të improvizuar, një shembull që të gjithë ju drejtuesit e organizatës mund t’i referoheni. Dy biznese A dhe B zhvillojnë aktivitetin e tyre gjeografikisht afër njëri me tjetrin dhe realizojnë ndërkohë produkte/shërbime tërësisht të njëjta. Komania A përqendrohet tek klientët, punëson talente në shitje dhe marketing, ndjek dhe zhvillon një plan marketingu. Kompania B merret vetëm me shitjet, shitësit apo dekorin e dyqaneve të saj. B-ja, nuk ndjek dhe zhvillon një planifikim dinamik të marketingut, nuk motivon punonjësit dhe neglizhon luftën për një klientelë besnike. Çfarë do të ndodhë? Çdonjëri e kupton fatin e kompanisë B. Ajo do të lëvizë në një kohë të shkurtër drejt falimentit, edhe në mungesë të kompanisë A. Në fakt B-ja nuk ka asnjë mundësi tjetër.
Është detyrë e departamentit, drejtorit apo përgjegjësit të marketingut: Të punësojë, trajnojë dhe vlerësojë në dinamikë punonjësit e marketingut; Të jetë përgjegjës për ecurinë dhe mbarëvajtjen e strategjisë së marketigut; Të integrojë klientelën me produktet, shërbimet dhe ofertat; Të eksplorojë dhe sigurojë mundësi të reja fitimi; Të aplikojë marketingun online, marrëdhëniet publike, marketingun në ceremoni, marketingun nga internet dhe miksmarketingun; Të organizojë marketingun në bazë të aftësive, produkteve të caktuara, segmenteve të tregut dhe hartës gjeografike.
Kur organizata është gati të lançojë në treg një produkt/shërbim të ri, skuadra e marketingut përgatit menjëherë planin e punës, i cili përfshin cilësitë më të mira të produktit/shërbimit, përfitimet, çmimin dhe caktimin e tij, pozicionimin për shpërndarje dhe përgaditjet për një promovim në shkallë të gjerë. Kur produkti/shërbimi është i maturuar atëherë energjia e marketingut duhet kanalizuar tek promovimi. Në rast se kërkesa për produktin/shërbimin potencial është më e lartë se oferta, atëherë promovimi duhet pakësuar, në të kundërt, duhet rritur dhe stimuluar.
Elementët promovues si: Reklama, sponsorizimet, e-marketingu etj, duhet të jenë në zhvillim të vazhdueshëm. Këta elementë mund të këmbejnë vendet here pas here në bazë të efektivitetit të tyre. Megjithatë, kompania nuk duhet të harrojë të kryejë shpenzimet e duhura tek tre elementët e tjerë të planit: Produkti, Çmimi dhe Pozicionimi.
Marketingu lidhet me faktin se sa e aftë është skuadra e marketingut të prodhojë ide. Është një ndër elementët thelbësorë të marketingut dhe biznesit. Idetë duhet të integrohen në planin marketing. Fjala këtu është për idetë e reja dhe revolucionare. Idetë e reja janë si pimezonet e bërthamës atomike, brenda së cilës notojnë nuklonet e saj. Pa ekzistencën e këtyre pimezoneve, nuklonet s’do mund të jetonin dhe pa nuklonet s’do mund të ekzistonin atomet, molekulat apo materia. Të prodhosh ide do të thotë të mbash në këmbë organizatën, pra: Punonjësit, skuadrat e ndryshme, objektivat e biznesit, etj. Për idetë e reja, revolucionare dhe që prodhojnë rezultate kompanitë duhet të programojnë stimuj të ndryshëm, bonuse etj. Menaxherët, arkitektët, dizenjuesit, inxhinierët, punonjësit në përgjithësi janë së bashku në organizatë për të shkuar përpara me prosperimin e saj dhe objektivat gjithashtu. Të prodhosh ide, është fraza magjike pa të cilën suksesi s’do mund të ishte i plotë dhe i qëndrueshëm dhe kjo s’duhet harruar.
Politika marketing është detyrë ekskluzive e departamentit. Por japonezët mendojnë ndryshe. Ata janë të gjithë tek prodhimi, ndërkohë, të gjithë së bashku tek shitjet. Marketingu vërtet ekzekutohet nga punonjësit e marketingut, por duhet të jetë edhe obligim i gjithë organizatës. Përveç menaxherëve të marketingut, hulumtuesve të tregut, shitësve, konsulentëve etj, marketing mund dhe duhet të bëjnë të gjithë anëtarët e organizatës. Edhe pse njohuritë e tyre në marketing mund të jenë të kufizuara, këta punonjës do mund të jepnin një ndihmë të madhe. Profesionistët e marketingut dhe punonjësit e tjerë të organizatës janë dhe duhet të sillen si një skuadër e vërtetë. Ky koncept duhet aplikuar brenda dhe jashtë mureve të organizatës, në funksion të marketingut dhe të suksesit.
Duke u nisur nga konceptet që shoqërojnë një organizatë të vërtetë, atëherë shprehja Klienti është i pari, mund të duket e zbehtë dhe ndoshta e parëndësishme. Nëse kompania kënaq punonjësit e saj, atëherë edhe klientët do mund të jenë të kënaqur. Si rregull punonjësit janë të kënaqur kur ata përmbushin, plotësojnë apo marrin: Të paktën nevojat ekonomike bazë të tyre dhe të familjes; Trajnim dhe kualifikim të vazhdueshëm; Indeksim të pagës në përputhje me inflacionin; Komisione, bonuse dhe shpërblime; Respekt për kontratën e tyre të punës.
Nëse organizata ekzekuton një vlerësim dinamik të punonjësve në bazë të meritës dhe kontributeve, atëherë ky do të ishte marketingu i parë më i mirë dhe më efektiv për organizatën. Ky lloj marketingu quhet marketing i brendshëm. Kështu shprehja Klienti është i pari, zëvendësohet me shprehjen Punonjësi është i pari apo këto dy shprehje mund të lëvizin paralel dhe së bashku. Të gjithë jemi dakord që klientët përfaqësojnë zhvillimin e kompanisë dhe performancën e saj. Por pyetjet që shtrohen do të ishin: Si mund të përballoj kompania konkurrencën gjithnjë e në rritje? Cilët njerëz/skuadra do mund të ishin gati të emetonin dhe ekzekutonin ide revolucionare në favor të kompanisë? Kur zgjerohet një biznes? Si e kuptoni shprehjen: Shpirti kryengritës i skuadrës? Këto pyetje, marrin përgjigje pozitive vetëm kur në organizatë militojnë punonjës të motivuar dhe kjo s’duhet harruar. Këto pyetje janë të kënaqura me përgjigjet e tyre, vetëm atëherë: Kur skuadrat brenda organizatës vrapojnë pa u ndalur drejt suksesit; Kur anëtarët e organizatës ekzekutojnë përpikërisht detyrat e tyre funksionale dhe marrin përgjegjësi shtesë. Të gjitha këto arsyetime kthehen në realitete vetëm kur ato interferojnë me: Punonjësi është i pari.
Njerëzit kanë nevojë të vlerësohen dhe motivohen. Kësaj teme do i rikthehemi herë pas here. Të huajt e njohin shumë mirë atë që quhet: Punonjësi është i pari. Ata janë të saktë kur vjen puna tek pjesa më e rëndësishme e marketingut: Marketingu i brendshëm. Ata buzëqeshin, përshëndesin dhe kthejnë përshëndetjet, ulen në tavolinë me punonjësit e tyre, pa komplekse dhe ceremoni, paguajnë mirë, dëgjojnë dhe zgjidhin probleme. E kundërta ndodh me shqiptarët, natyrisht jo me të gjithë. Bosët shqiptarë dhe pa të ardhme, hyjnë në marrëveshje me punonjësin e ardhshëm të biznesit dhe më pas e shkelin këtë marrëveshje. Caktojnë së bashku me punonjësin e tyre detyrat dhe pagën dhe më pas i njollosin këto nënshkrime. Këta punëdhënës shqiptarë: Shfaqin në mënyrë diskrete porcione diskriminuese në raport me punonjësin; Mendojnë natë e ditë vetëm për interesat e tyre ekonomike dhe personale; Aplikojnë standarde të ndyshme të punës dhe vlerësimit të saj; Mbështesin njerëzit mediokër brenda biznesit të tyre; Hartojnë me nxitim plane marketingu; Orientojnë politika biznesi dhe zhvillimi pa u konsultuar me skuadrat e tyre etj. Këta punëdhënës, nuk kanë kohën e duhur në dispozicion për të krijuar skuadra dhe ekipe të vërteta pune. Ata nuk takohen ndoshta fare me punonjësit e tyre, në takime të rregullta dhe formale. E thënë ndryshe, këta bosë mediokër gjithçka e dinë vetë.
Biznesi shqiptar është duke lëvizur në shumë korsi. Në korsinë e parë rendin të suksesshmit. Drejtuesit e këtyre bizneseve shfaqin mjaft lidership dhe vlera të vërteta, janë dëgjues dhe motivues të mirë, këshillues konciz, mbresëlënës dhe pika referimi për punonjësit e tyre. Këta biznese janë aty ku janë, pasi në mënyrë eksplicite apo indirekte kanë ekzekutuar parimin: Punonjësi është i pari.
Renditëm përmbledhtazi këto paragrafe, për të kuptuar përfundimisht, që ekziston vetëm një marketing dhe dy derivate të para të tij: Marketingu i brendshëm dhe Marketingu i jashtëm. Mendoni për një çast luftën e madhe të organizatës vetëm në një drejtim. Thjesht nuk do të funksiononte. Është koha që bizneset shqiptare të drejtojnë strategjinë/taktikat e tyre veç të tjerash edhe nëpërmjet koordinimit të marketingut të jashtëm me marketingun e brendshëm. Në fakt është rruga e vetme dhe më e sigurta drejt suksesit.